РУСКИ КЕРЕСТУР – На заєднїцкей схадзки Орґанизацийного и Програмного одбору 57. Фестивалу рускей култури „Червена ружа”, отриманей вчера, 11. юния, утвердзени и верификовани програми Фестивалу хтори будзе 29. и 30. юния.
„Червена ружа” почнє на пияток, 29. юния, зоз виставу малюнкох и рисункох младей уметнїци Лари Петкович з Нового Саду. Вистава будзе отворена на 16,30 годзин у Спортскей гали, пред ювилейним, 50. „Червеним пупчом”, хторе почнє на 17 годзин у школским дворе. На нїм буду виведзени дзешец нови композициї за дзеци, як и традицийни и модерни танци, а будзе и вистава дзецинских русинкох на тему родзеного дня „Червеного пупча”.
На 22 годзин почнє манифестация „Червена ружа”, на хторей будзе 12 точки, а млади ше того року першираз буду змагац за найкрасши дзивоцки глас зоз забавнима шпиванками, за найлєпшу авторску композицию, як и за вкупни наступ.
Други дзень Фестивалу, соботу, 30. юния, Здруженє женох „Байка” у Майсторским доме орґанизує даскельо роботнї, на 21 годзин почню „Одгуки ровнїни”, ревиялни наступ руских ансамблох, а потим наступи и госцуюци ансамбл КУД „Раванґрад” зоз Зомбора.
Обидва днї после програмох будзе друженє за учашнїкох и публику, а пияток будзе грац бенд „Банда дрвена”, у орґанизациї младежскoго здруженя „Pact Ruthenorum”, док соботу наступи бенд зоз Коцура. Тиж так, под час обидвох фестивалских дньох од 14 годзин за нащивительох будзе отворена Музейна збирка у будинку „Замок”.
Цена уходнїцох за Фестивал будзе 200 динари на дзень, а уход за дзеци шлєбодни. За Фестивал обезпечени милион 270 тисячи динари зоз вецей жридлох, од Републики, Покраїни, Општини Кула и Националного совиту Руснацох, а першираз и од Амбасади України у Сербиї.