Як познате, тогорочни 49. Драмски мемориял Петра Ризнича Дядї будзе отримани у новим термину, од 18. по 26. марец. После децениї и пол, то врацанє на дакедишнї порядни час отримованя тей смотри нашей драмскей творчосци. До прекладаня Мемориялу з жими баржей до яри пришло початком дзеведзешатих рокох прешлого вику, пре тедишнї часи, познате яки, кед нє могло пририхтовац и бавиц представи у жимних салох.
Нови (стари) термин отримованя Мемориялу виволал и одредзени реакциї у наших дружтвох хтори дотераз поряднєйше пририхтовали представи. Вокраци, дружтва зауважую же су позно обвисцени о пременки, та же по початок Мемориялу нєт часу поставиц представу. Медзитим, предсидатель Орґанизацийного одбору и о. д. директора Дома култури Йоаким Рац на вецей заводи визначел же о пременки термину бешедоване ище под час лоньского Мемориялу, же перша службена информация о новим термину до наших КУД-ох послата ище 27. октобра 2016. року, а друга 9. януара того року, так же, як гварел Рац, нє мож бешедовац о тим же КУД-и нє були на час поинформовани кеди будзе Мемориял.
На тогорочним Драмским мемориялу Петра Ризнича Дядї буду участвовац пейц представи за старших и два дзецински. Медзи нїма, з наших местох на репертоаре буду три представи за старших и два дзецински. У одношеню на прешли рок, то за єдну представу за старших и два дзецински менша продукция з наших местох на Мемориялу.
З новима представами остатнї час кобури и новосадски Руски фестивал малих сценских формох „Дюра Папгаргаї”, так же тота уж даскельорочна криза у нашим театралним живоце тераз очиглядна. Кед будземе по тим же чи погар до поли празни, чи полни – зочованє з кризу початок єй систематичного ришованя. Прето Национални совит Руснацох у тим року одредзени средства опредзелї и за пририхтованє представох, як помоц и стимул рускому театру. Аж споминане и одредзене „обовязне” пририхтованє дзецинских представох у наших местох – и пре пестованє руского язика, и пре будуци кадри за наш театрални живот. То значи же у наших дружтвох уж мож почац роздумовац о пририхтованю представох за шлїдуюци Мемориялу и конкуровац нє лєм за средства, алє и за фахову помоц.