Чувар памяткох

автор александар саванович
651 Опатрене

Живот, хтори нас иншак часто ламе и ведзе по драгох по хторих бизме нароком нїґда нє рушели, за мнє од Миколая по Богоявлєнє вше ма якишик одредзени ритем. Гоч кельо у тим чаше да єст роботи и професийни обовязки, я функционуєм у „шветочним моду”. На концу, тельо ше красного случело у моїм приватним и нашим  духовним календаре, же тот шветочни мешац наисце муши буц окремни.

Од того року мам и нови арґумент же чом швециц починам уж од 6. децембра, Миколая по новим календаре. Од того року наша церква и териториялно, и административно заокружена до Епархиї Св. Миколая – Руски Керестур. Зоз тим, читанка духовного живота грекокатолїкох у Сербиї почала виписовац перши шорики нового поглавя. Препущел сом привилеґию присуствовац преглашеню тей радосней вистки у катедралней церкви, алє ше наздавам же нарок, док на дзень велького святителя ширцом нового владичества будзе означована перша його рочнїца, будзем там.

Ище док сом бул  дзецко, анї єден одход до баби и дїда до Дюрдьова през викенд нє прешол без служби внєдзелю. Ишло ше додня до Малей служби. Нормално, як и кажде дзецко, нєбогзна цо сом розумел, було ми жимно, длуго и допито, алє дїдо и баба були добри педаґоґи – кед сом заспал и одправел Малу, мушел сом до Велькей хтора гет длукша… Углавним у Дюрдьове сом розвил рутинске звикнуце же ше внєдзелю става скорей и идзе до Малей, же би ме „обишла”  безконєчна Велька

Праве тот децемберски период, патраци по старим календаре, вше ми бул окреме  важни. Од Миколая, кед зме коло руского пеца шицки вєдно шпивали прекрасну шпиванку  „О кто, о кто”, та по Крачун, коляди  и далєй. Анї сом нє штудирал чом ше лєм на тот дзень шпива Миколайови, лєбо чом ше лєм теди колядує, алє сом одвше знал же праве прето тоти днї окремни и иншаки. Мушим припознац же сом мал окремну привилеґию – дїдо бул дзияк, ґу тому точни и наисце музикални, та сом шицки тоти шпиваня научел як треба, у полней їх красоти. Чкода же зме ше нїгда нє здогадли зазначиц тоти хвильки на дїдовим касеташу. Медзитим, и без того документу, памятки ше у тот жимушнї час вше зобудза. Гоч до хторей церкви войдзем през швета, вше ми на розум придзе дюрдьовски иконостас, и горуци руски пец, и оквицени ядловец и под нїм слама и колядованє як одгукує под конком. Церква ми так од нєдзельовей дзецинскей обовязки, през одрастанє постала чувар найкрасших памяткох. Як цо уж виками чува народне паметанє своїх вирних.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ