ЗАХОДНОБАЧКИ ОКРУГ – На локалитетох хтори провадзи Польопривредна фахова служба у Зомборе, у маю спадло од 25 до 40 литри дижджу по квадратним метеру.
Польопривредни продукователє и фаховци согласни же после сушного периоду у марцу и априлу, стан жимских и ярнїх културох задоволююци дзекуюци майским дижджом, хтори нападали праве кед требало.
Фаховци наглашую же при житаркох, як пошлїдок суши, пришло до перших симптомох сушеня верхох лїсцох.
– Дижджи добре пришли за укореньованє и напредованє рошлїнох, за цо добри терашнї високи температури. Мали зме жимни април, алє на подручу хторе провадзиме нє було мразу. Найнїзши температури були од 0,2 – 0,3 ступнї, алє при житаркох физиолоґийни процеси ставаю на 5 ступнї, док физиолоґийни процеси кукурици и сої ставаю на 10 ступнї. Нє бул вигодни период, алє тераз зме вошли до єдного барз вигодного периоду – потолковал совитодаватель з Польопривредней фаховей служби у Зомборе Зоран Боцо.
Кажде залїванє трошок, та майски дижджи благодатни нє лєм за землєдїлцох, алє и за овоцарох и заградкарох, наглашую фаховци з Польопривредней фаховей служби Зомбор.