РУСКИ КЕРЕСТУР – Свой Дзень Основна и штредня школа з домом школярох „Петро Кузмяк” з Руского Керестура вчера, 25. мая, означела зоз шветочну програму у Велькей сали Дому култури, з отвераньом подобовей вистави у школским голу свойого наставнїка Иґора Радовича, а през дзень з интересантним и обсяжним Саймом науки у Школи.
На шветочней програми шицким школяром, колеґом и шицким Керестурцом Дзень школи повинчовала єй директорка Хелена Пашо Павлович, а пречитала и винчованку хтору з тей нагоди Школи послал подпредсидатель Покраїнскей влади и покраїнски секретар за образованє, предписаня, управу и национални меншини-национални заєднїци Михаль Нїлаш.
У винчованки покраїнски секретар Нїлаш керестурскей двоязичней школи висловел шицки похвали и пре єй длугорочну традицию и пожадал дальшу успишну роботу у образованю и воспитаню будуцих преднякох медзи Руснацами и успихи у шицких наставних и звонканаставних активносцох.
През конферансу на програми визначени и шицки посцигнути успихи школярох Школи на змаганьох з рижних предметох на рижних уровньох, од општинского по републични.
У програми свойо таланти и знаня указали и школяре основней и штреднєй школи и численей публики ше представели з хорским, соло и ґрупним шпиваньом, рецитованьом, ритмичнима танцами, драмскима сличками и литературнима творами.
Програму провадзели и госци – Предсидателька Одбору за образованє Националного совиту (НС) Руснацох Мелания Римар, предсидатель Вивершного одбору НС Желько Ковач, предсидатель Совиту Месней заєднїци Руски Керестур и член НС Руснацох Владимир Олеяр, просвитни роботнїки з ОШ „Братство єдинство” з Коцура, на чолє з директорку Славицу Байор, як и представителє дзепоєдних керестурских здруженьох.
По програми, у школским голу директорка Хелена Пашо Павлович и Татяна Чизмар з Нового Саду отворели виставу подобових роботох академского маляра, професора у керестурскей Школи Иґора Радовича, по опредзелєню абстрактни маляра.