РУСКИ КЕРЕСТУР – У преполней Велькей сали Дому култури 49. Драмски мемориял Петра Ризнича Дядї всоботу, 18. марца шветочно отворели о.д. директора Дому култури и предсидатель Орґанизацийного одбору Мемориялу Йоаким Рац и режисер и драмски писатель Звонимир Павлович.
Привитуюци публику, Йоаким Рац виражел и наздаванє же шлїдуюци меморияли буду репертоарно богатши, понеже и нашо чолни институциї маю намиру вецей укладац до театралней творчосци, публики пожадал же би уживала у тогорочних представох, а окреме представел и привитал спомнутого Звонимира Павловича, родом Керестурца, нєшка Новосадяна, котри и автор тексту представи „Зазбероваче труплох” з чию премиєру Мемориял и почал.
Отвераюци Мемориял, Павлович з тей нагоди здогаднул на свойо перше стренуце з филмску уметносцу праве у тей истей сали у Керестуре, та на познєйшу активносц у театралней уметносци. Визначел свойо мотиви и виглєдованя – од театру конфронтациї по ткв. амбиєнтални театер, хтори дава нєпоштредни контакт актерох у представи з публику, и свойо експериментованя хтори го женю на театралну творчосц.
