РУСКИ КЕРЕСТУР – У провинцийним доме и манастире шестрох служебнїцох у Руским Керестуре, од 12. по 18. марец, шестри мали Духовни вежби, а вчера, 19. марца, з архиєрейску Службу Божу означели дзень защитнїка своєй провинциї св. Йосифа.
Порядни Духовни вежби шестри отримую у трох ґрупох, а на тот завод на нїх участвовали 16 углавним старши шестри, хтори жию у керестурским манастире. Тема була о Божей любови ґу нам, а викладаня мал монах редемпторист о. Ярослав Штелбаски зоз Словацкей.
Дзень по Духовних вежбох, 19. марца, шестри означели и дзень патрона їх провинциї у Сербиї, св. Йосифа. З тей нагоди владика Георгий Джуджар предводзел Службу Божу у манастирскей каплїци, а сослужели о. Штелбаски и парох керестурски о. Михайло Малацко.
Владика и наказовал о св. Йосифови и його „цихим” служеню и вивершованю волї Божей. Понеже на тот дзень владика Георгий бул пошвецени за архиєрея у Риме, у мено шестрох му повинчовала провинциялна настоятелька ш. Мартина Кмита.
