СРИМСКА МИТРОВИЦА – На Зонскей смотри рецитаторох „Поету народа мойого”, хтора отримана 24. и 25. марца у Сримскей Митровици, у конкуренциї 115 рецитаторох, зоз шидскей општини ше на ювилейну 50. Покраїнску смотру, хтора будзе отримана од 20. по 22. април у Сечню, пласовали шесцеро рецитаторе.
У младшим возросту на висши ступень ше пласовала Лаура Йованович, школярка першей класи Основней школи „Сримски фронт” зоз Шиду.
У штреднїм возросту на Покраїну пласовали ше Срна Аничич, школярка пиятей класи ОШ „Бранко Радичевич“ зоз Шиду, Урош Дамянович, зоз шестей класи ОШ „Вук Караджич“ з Адашевцох, Аня Вейнович, школярка седмей класи ОШ „Бранко Радичевич” зоз Шиду и Ивана Зорнян, з осмей класи ОШ „Сава Шуманович” з Ердевику.
Надя Билкан, школярка трецей класи Ґимназиї „Сава Шуманович“ зоз Шиду будзе представяц шидску општини на покраїнскей смотри у старшим возросту.
(На насловней фотоґрафиї Срна Аничич на Општинскей смотри рецитаторох у Шидзе)