ШИД – Кандидат за предсидателя Сербиї Воїслав Шешель всоботу, 18. марца, на промоциї опрез шедзиска Општинского одбору Сербскей радикалней странки (СРС) у Шидзе поручел своїм прихильнїком же ше пласує до другого виберанкового кругу и же вец победзи на виберанкох за предсидателя.
Наглашел же ше спомедзи терашнїх кандидатох лєм вон може спроцивиц и победзиц Александра Вучича, а потим контроловац власц.
Як свойо основни напрями на функциї предсидателя Сербиї Шешель наведол претаргованє прегваркох з Европску унию и вязанє з Русию хтора, як наглашел, допоможе змоцньованю Сербиї, а потим и отвераню питаня положеня „сербских жемох“.
Шешель на промоциї у Шидзе визначел же народу вше гутори лєм правду и же у Гаґу доказал же є порихтани жертвовац ше за Сербию и Сербство. Ґу тому, наглашел же як цо є тераз у контакту з народом – так будзе и як предсидатель Сербиї.
Окрем Шиду, Воїслав Шешель всоботу у Сриме нащивел и Сримску Митровицу, Руму, Ириґ, Индїю и Стару Пазову.