ШИД – Министерство култури и информованя Влади Републики Сербиї потримало проєкт Општини Шид з назву „Зачувайме културу Шиду” и у рамикох Програми „Городи у фокусу”, шидскей општини одобрени 19 милиони динари за цалосну реконструкцию сали Културно-образовного центру у Шидзе.
Проєкт тих дньох на окремней конференциї за новинарох представел предсидатель Општини Шид Предраґ Вукович, визначуюци же є медзи дзешец найлєпшима хтори потримало спомнуте министерство.
Попри тим, як гварел Вукович, у шидскей општни за остатнї рок витворени вецей проєкти як за остатнї 30 роки, а попри комплетного оправяня Културно-образовного центру, пошвидко почнє и адаптованє ОШ „Сримски гронт”, опреманє индустрийней зони, вибудов кружного цеку, реконструкция спортскей гали и водоводу у Соту.
Вукович визначел же за шицки проєкти пенєж обезпечени з републичного, лєбо покраїнского буджету и з тей нагоди подзековал на тей велькей потримовки хтору Општина Шид ма од Влади Републики Сербиї и Покраїнскей влади.
