РУСКИ КЕРЕСТУР – Керестурскей жительки Сени Шимко, хтора бива на улїци Дюру Кишюгаса, прешлого тижня у єдней хижи спадла повала. За оправку потребни вельки пенєж, та Шимкова модлї кед дахто може помогнуц.
Гоч су по закону нє обовязни, Месна заєднїца ше уключела помогнуц так же опрез своїх просторийох положела шкатулу до хторей мож дац добродзечни прилог. Комуналне подприємство „Руском” обезпечело трактор за розчисцованє, а Центер за социялну роботу хтори вишол опатриц чкоду, помогнє з єднократну пенєжну помоцу.
По першим преценьованю майстра, до чкоди пришло пре длугорочне премаканє и будзе требац оправиц коло 50 квадрати закрица и 30 повали, цо будзе коштац коло два тисячи еври.
Шимкова осемдзешатрочна ґдовица з нїзку пензию и ма двойо дзеци хтори єй, по єй словох, нє у можлївосци финансийно помогнуц пре здравствени и други причини, та ше прето вола и на солидарносц своїх согражданох.
Окрем до шкатули пред МЗ, хто жада помогнуц може и на жиро рахунок Шимковей 200-65255030-41 отворени у банки Поштанскей шпоровнї.
