РУСКИ КЕРЕСТУР – У Основней школи „Петро Кузмяк” у Руским Керестуре тих дньох подзелєна векшина з 57 комплетох безплатних учебнїкох школяром од 1. по 8. класу. Учебнїки до Школи сцигли 15. авґуста, а школяром котри их ище нє достали буду придати 1. септембра, на початку нового школского рока – дознава Рутенпрес у управи Школи.
На таку файту помоци право витворели школяре з фамелийох слабшого материялного стану, як и дзеци з фамелийох у хторей єст тройо, або вецей школярох.
Безплатни учебнїки за 86 000 школярох у цалей Сербиї, цо за 36 000 вецей як влонї, обезпечела Влада Сербиї, и за тоту намену опредзелєни коло 572 милиони динари.