НОВИ САД – У просторийох Екуменскей гуманитарней орґанизациї (ЕГО) у Новим Садзе вчера, 18. априла, отримана конференция за пресу з нагоди значного ювилея – 25 рокох роботи ЕГО центру.
Тилда Дєнґе Слифка, директорка ЕГО у Републики Сербиї, надпомла же Екуменска гуманитарна служба основана 1993. року. Инициятиву за снованє порушал Шветови совит церквох, а у чиїм членстве Сербска православна церква, Реформаторска християнска церква, Словацка евангелистична А.В. церква и Евангелистично методистична церква. Од теди по нєшка, служба преросла до гуманитарней орґанизациї и єдна є з найвекших и водзацих орґанизацийох цивилного дружтва хтора фокусована на дружтвени проблеми цивилного дружтва у найширшим значеню.
Нєшка ЕГО ма вецей як 80 заняти особи, услуги центра хасную 20 000 особи у 40 городох и општинох у Републики Сербиї.
ЕГО за 25 роки иснованя реализовала 1 240 гуманитарни и розвойни проєкти, помогла вецей як 800 000 особом, подзелєла гуманитарну помоц вецей як 200 000 вибеженцом и миґрантом, социялно загроженим особом вибудовани хижи лєбо им уручена помоц за вибудов основней инфраструктури у худобних крайох.
У рамикох означованя ювилею истого дня отримани Шести партнерски сход на хторим участвую вецей як 40 партнерски орґанизациї зоз Сербиї, Европи и Америки.