Ютрейшу виставу у Городским музею отвори Дадо Топич

автор але
996 Опатрене

ВЕРБАС – У рамикох манифестациї „Музеї Сербиї, дзешец днї од 10 до 10”, Културни центер Вербас и Городски музей ше тиж приключа ґу заєднїцкей теми „Музей у госцох, а Городски музей у Вербаше вибрал и дополнююцу – „50 роки рокенролу у Вербаше. Манифестация почнє на ютре, 11. мая на 19 годзин з виставу фотоґрафийох на спомнуту тему, хтору отвори познати музичар Дадо Топич, а потим зоз свою ґрупу отрима концерт на городскей площи.

Од 11. по 20. май, докля тирва манифестация, кажди вечар на 20 годзин на площи опрез Музею буду концерти рок, поп, еверґрин и других файтох музики. Концерти буду провадзени з презентацию домашнього пива технолоґа з Вербасу.

8-Muzej-02

На пияток, 12. мая, вербаскей публики будзе представена поставка Городского музею зоз Зренянину, а исти вечар на 20 годзин будзе и концерт еверґрин музики ґрупи Сателит зоз Зренянину.

Трибина о рокенрол-музики будзе 13. мая, а о вербаским рокенролу 15. мая. Од 18. мая у Биоскопу „Югославия“ кажди дзень буду безплатни проєкциї филмох.

Манифестацию буду провадзиц и вербаски маляре – з виставу фотоґрафийох (11. мая), подобову колонию (14. мая), виставу портретох (17. мая), а шицки дзешец днї у голу Музею будзе вистава Дейвид Боуви иРолинґ Стоунси.

До манифестациї буду уключени и дзеци з оводи, основних школох, музичней школи, балетней школи, а окремна тематска журка за наймладших будзе 18. мая на 16,30 годзин. Шицки приграми на манифестациї безплатни.

ПОВЯЗАНИ ТЕКСТИ