АПОСТОЛСКИ ЕҐЗАРХАТ/РУСКИ КЕРЕСТУР – У Марийовим святилїщу Водици коло Руского Керестура на ютре, 6. юния, на Завитни дзень, шветочно будзе означени значни ювилей – 200-рочнїца перших указаньох Мариї у студзенки коло драги до дакедишнього Филїпова,1817. року.
Завитни дзень у Водици ше у нашей церкви на тих просторох и у народзе означує на Треци дзень єдного з найвекших християнских шветох – Сошествиє Св. духа, на Русадля, а того року Русадля падаю источашнє по обидвох календарохх.
Шветочна Архиєрейска Служба Божа на ютре у Водици будзе на 11 годзин, а з нашим владиком Георгийом Джуджаром будзе ю предводзиц апостолски нунций у Сербиї монс. Лучано Сурияни, беоґрадски архиепископ Станислав Хочевар и други владикове, вельке число священїкох, а обчекує ше и приход числених вирних зоз шицких наших парохийох.
Нєшка, пондзелок, на 17 годзин з церковней порти руша процесия до Водици, а на 19 годзин там будзе Служба Божа, з мированьом.
З нагоди ювилею обявене и треце, дополнєте виданє кнїжки о Водици о. Владислава Варґу, як и окремна брошура о тим Марийовим святилїщу.