РУСКИ КЕРЕСТУР – У Руским Керестуре на ютре 9. новембра, зоз промоцию найновших кнїжкох на руским язику почина 25. Културна манифестация „Костельникова єшень”, з котру будзе означена и 70-рочнїца шмерци Гавриїла Костельника.
Промоциї нових кнїжкох на руским язику и стретнуце зоз писателями буду отримани ютре од 11,30 годзин у Школи „Петро Кузмяк”, а потим и у Ресторану „Червена ружа” на 18 годзин у Руским Керестуре. Подобна програма будзе 15. новембра од 12 годзин, у ОШ „Братство єдинство” у Коцуре.
На тот завод буду представени нови литературни твори Агнети Бучко Папгаргаї збирка приповедкох „Там дзе слунко виходзи”, кнїжки поезиї Тамари Хрин Рончевич „Капка на концу нохца”, Якима Чапка „Церень спод нохца”, Михала Рамача „Дуга над Дунайом”, интервюи Олени Планчак Сакач „Вецей од бешеди” и антолоґия дзецинскей приповедки хтору пририхтала Мелания Римар. На Стретнуцу за старших, попри спомнутих писательох, будзе представена и найновша кнїжка академика Юлияна Тамаша, а представи ше и госцинска писателька з Нового Пазару Надия Реброня. У музичней часци того вечара наступи Дзивоцка шпивацка ґрупа Дома култури Руски Керестур.
Традицийне Стретнуце рецитаторох з наших руских местох будзе 10. новембра у Кули у Школи „Петефи бриґада”, а нєпоштредни орґанизатор му кулске РКУД „Др Гавриїл Костельник”. Од того року Стретнуце рецитаторох у своєй назви будзе мац мено Михайла Зазуляка як тирваце здогадованє на пред роком упокоєного визначного фаховца у тей обласци.
У рамикох „Костельниковей єшенї” у Коцуре 10. новембра пригодни програми буду у Етно-клубу „Одняте од забуца” – вистава з Подобовей колониї „Коцур 2018” и литературно-музични вечар „На чесц Костельникови”. Програми орґанизую сам Етно-клуб, Дом култури и МО Рускей матки Коцур.
Други викенд, 17. новембра резервовани за литературни вечар у Дюрдьове у КУД „Тарас Шевченко”, дзе на 19 годзин будзе промоция новей кнїжки Якима Чапка, як литературно-музични вечар. Истого вечара у Руским Керестуре у Доме култури час пошвецени младим творительом хтори на 21 годзин наступя у Мултимедиялней програми младих „Дньовка”. На 20 годзин орґанизаторе „Дньовки” пририхтую отверанє вистави фотоґрафийох на тему „Вода” за хтору отворени конкурс.