Роботи такой почню и маю буц готови по конєц новембра, док у другей фази плановане адаптованє пойда. Проєкт за Бикич ше ище розпатра Владическа конференция Италиї вєдно зоз Каритасом Италиї оддобрели средства за помоц владичеством хтори ше находза на „миґрантскей драги” медзи хторима и парохиї Апостолского еґзархату за грекокатолїкох Сербиї у Сриме.
По словох Елемира Джуджара, координатора Каритасу Апостолского еґзархату, з благословом нашого владики кир Георгия Джуджара написани и поднєшени два проєкти хтори ше одноша на парохиї у Шидзе, як и на филиялу беркасовскей парохиї у Бикичу.
ОПРЕДЗЕЛЄНИ 87 000 ЕВРА ЗА ПРОЄКТ
– Проєкт за обнову Лєтнєй владическей резиденциї оддобрени и за тоту намену опредзелєни 87 000 евра, же би Резиденция була ушорена же би могла прияц волонтерох и особи хтори ше стараю у роботи з миґрантами – гварел Елемир Джуджар. – Будинок Резиденциї ше будзе зогривац, адаптує ше шицки хижи за змесценє, кухню, санитарни ґузел, витворени условия за райбанє и будзе купени потребни мебель.
Будинок будзе присподобени и за потреби других особох, хтори би могли ту пребувац по економскей цени, же би було обезпечене „самоотримованє”. Роботи почню тих дньох и мали би буц закончени по конєц новембра.
По словох Анити Ґовля, координаторки Каритасу Нови Сад и фаховей сотруднїци на проєкту, други проєкт написани и придати за ушоренє Пасторалного центру у Бикичу.
– Тот проєкт у вредносци 38 000 еври тераз на розпатраню, а требало би ришиц тиж зогриванє будинку, ушориц кухню, обезпечиц условия за пребуване и спанє у хижох, заврец терасу (конк) и ушориц дражки коло Пасторалного центру – потолковала Ґовльова.
ЗАДОВОЛЬНИ ПРЕДСТАВНЇКИ З ИТАЛИЇ И НЄМЕЦКЕЙ
У другей фази роботох плановане ушориц пойд Лєтнєй владическей резиденциї хтори би же адаптовало и вихасновало тиж за пребуванє у хижох и можебуц би була и менша сала у тим просторе.
Прешлого пиятку, 11. марца, Елемир Джуджар и Анита Ґовля були домашнї и прияли Даниела Бомбардия, хтори бул у мено Каритасу „Италиана” и Тобиаса Ноелке, у мено Каритасу Нємецкей, хтори задлужени за миґрантски питаня, а бул присутни и Петар Дуїч, координатор Каритасу за Срим.
Вони вєдно пообиходзели Резиденцию, а Тобиас Ноелке гварел же у тим будинку злучене стародавне и нове, цо дава одредзену цеплоту месту хторе може обезпечиц добри условия за пребуванє волонтерох и особох хтори помагаю у роботи з миґрантами. Подобни упечетки подзелєл и Даниеле Бомбарди, хтори гварел же Резиденция ма вельки потенцияли.
И ГОРОД БУДЗЕ КРАСШИ
После пейцох рокох, почалo малтерованє мурика опрез будинку Лєтнєй владическей резиденциї, бо сцигли средства зоз АП Войводини и локалней самоуправи. Покраїна опредзелєла 458 000 динари, а локална самоуправа 150 000 динари. Майстор Ивица Болдиш зоз своїма роботнїками дал ше до роботи и мурик ма нови випатрунок, а парох о. Михайло Режак планує, кед будзе средства, нову желєзну капуру и роштелї на мурику. З тим будзе красши и город.
