Акцент на розвой привреди и прицагованє инвеститорох

автор сен
745 Опатрене

НОВИ САД – Пенєж з Покраїнского секретарияту за привреду, обезпечованє роботи и ровноправносц полох будзе наменєни насампредз за поднїмательство, ремеселнїцтво, туризем, транспорт, родну ровноправносц, злєпшанє положеня Ромох, та инспекцийни роботи – гварел ресорни секретар Мирослав Васин концом прешлого тижня на конференциї за новинарох.

Васин наглашел же найважнєйши циль у 2015. року будзе розвой привреди, цо будзе витворене прейґ конкурсох за порив странских укладаньох до АП Войводини, а значни пенєж будзе уложени до роботи кластер-орґанизацийох, односно до умрежованя подприємствох и орґанизацийох хтори би вєдно були конкурентнєйши на тарґовищу.

У обласци туризму плановани промоциї вивозу на домашнїх и на иножемних саймох. Покраїнски секретарият и того року опредзелєл одредзени средства и за конкурси за обнавянє и розвой старих и уметнїцких ремеслох.

Того року до транспортней инфраструктури будзе уложене вецей пенєжи як прешлого, понеже ше планує софинансовац вибудов кружних цекох на крижних драгох. Плановане розписованє и двох конкурсох наменєних розвою електронских комуникацийох и информацийного дружтва, а на нїх годни конкуровац локални самоуправи и нєвладов сектор.

У обласци ровноправносци полох будзе реализована Програма за защиту женох од насилства у фамелиї и партнерских одношеньох, а наявени и конкурси чий циль будзе финансийна потримовка женом. За унапредзованє положеня Ромох наявени штири конкурси.

ПОВЯЗАНИ ТЕКСТИ