РУСКИ КЕРЕСТУР – У Велькей сали Дому култури Руски Керестур всоботу, 17. децембра, отримани успишни Концерт народней шпиванки, хтори афирмовал младих шпивачох-аматерох котри векшином уж наступали на змаганю за найкрасши глас на „Червеней ружи”.
На Концерту наступели шесцеро солисти – Саня Чапко, Марина Роман, Мирослав Малацко, Таня Надь и пободнїки на тогорочней „Ружи” Кристина Афич и Роберт Загорянски. З двома акапела шпиванками наступела и Дзивоцка шпивацка ґрупа Дому култури, а як у конферанси потолковала Адриана Надь, пре обєктивни причини нє могли наступиц ище даскельо шпиваче-солисти.
Шпивачох провадзел Тамбурови оркестер Дому култури, под руководительством Мирка Преґуна, а Оркестер и сам одграл венчик руских народних шпиванкох.
Гоч Велька сала Дому култури була лєм лєм до половки пополнєта, присутна публика уживала у наступу младих шпивачох, котрих наградзела з длугима и щирима аплаузами.