Кед би грекокатолїцка парохия у Новим Садзе чекала на будовательни дозволи, ище вше бизме до церкви ходзели даґдзе до надкритей шопки на концу города – людзе на власци нїґда нє любели правиц храми.
Новосадски власци концом осемнастого вику нашей парохиї нїяк нє сцели предац порту за вибудов церкви. Вимоги одбити и 1802. и 1810. року… Нїби, завадзали им унияти, хто су, цо су. Вец то зробене на лукави способ – наменску порту, на котрей и нєшка стої церква, за свойо потреби купел православни вирнїк, и такой ю уступел нашей парохиї. Перше збудовани парохиялни дом, фундаменти храму поставени 1820. року, а правело ше ю од 1834. по 1837. рок.
Тих дньох вибудов Центра исламскей заєднїци у Новим Пазару розодкрил велї проблеми безправней вибудови у нас – вецейнаменски будинок ше прави нєлеґално, а власци нїч нє пребераю. Нїби, нє приходзи им на розум войовац зоз Муслиманами, гоч Исламска заєднїца уж 23 роки подношела вимоги за Центер, и шицко стої у бирократсакей процедури. Муамер Зукорлич, дараз муфтия, а тераз народни посланїк, пререзал, и Центер почал правиц безправно.
Вирски центер на Новим Беоґрадзе требал буц готови пред петнац роками, а ище вше ше го анї нє почало правиц. А, анї ше нє зна дзе будзе. Патриярх Ириней и городски менадажер Беоґраду, дзешка наяр, ше зложели же би локациї, и Блок 44, и Блок 64, були идеални за таки намени.
Храм Святого Сави ше почало правиц пред вецей як сто роками, углядни Беоґрадянє ище 1895. року сновали Дружтво за правенє храма Святого Сави. Тераз ше ушорює нукашньосц церкви.
Чудни драги небесни: прикри, кирвави, та и безправни.
Становиска висловени у тим тексту виключно авторово и нє вше одражую ушорйовацку политику новинох „Руске слово”.
www.vinaji.net