ШИД – За дочек 2016. року на Площи култури коло Културно-образовного центру у Шидзе 31. децембра нє будзе орґанизоване вешелє, гоч така традиция була роками, кед з музику трубачох, вареним вином, чаю и огньометом Шидянє дочековали Нови рок.
У Културно-образовним центре нє моги потвердзиц чи будзе орґанизовани и дочек Нового року по юлиянским календаре (13. януара по шветовним), цо остатнї роки тиж була традиция.
И у ресторанох у Шидзе дочек будзе орґанизовани у меншей мири як скорейши роки, а цена конзумациї ше руша од 2 000 динари по особи, та на висше. Млади Нови рок углавним дочекаю у числених кафичох.
Найвекше число жительох у Шидзе и шидскей општини нови 2016. рок дочека дома, з фамелию, родзину и приятелями.