РУСКИ КЕРЕСТУР – Тогорочна 22. Културна манифестация (КМ) „Костельникова єшень” будзе отримана од 6. по 21. новембер, утвердзене на вчерайшей схадзки Орґанизацийного одбору Манифестациї у керестурским Доме култури. Крем у Руским Керестуре, програми „Єшенї” буду у Коцуре, Дюрдьове и Кули, алє и у Осиєку, у Горватскей.
Попри представяня нових кнїжкох и рукописох збиркох наших писательох, новосц тогорочней КМ же знова предвидзене госцованє єдного еминентного сербского писателя, на тот завод то будзе Светислав Басара.
Наша явносц упозна и дотераз ту нєобявйовани твори Гавриїла Костельника, буду представени и два нови музични компакт-диски, а єден вечар на „Костельниковей єшенї” будзе госцовац и познати Суботицки тамбурови оркестер.
На вчерайшей схадзки Орґанизацийного одбору утвердзени термини и програма тогорочней „Костельниковей єшенї”
Програма „Костельниковей єшенї” 6. новембра почнє у керестурскей Школи „Петро Кузмяк” з представяньом нових творох Ирини Гади Ковачевич, Меланиї Римар, Агнети Бучко Папгаргаї, Владимира Бесерминя, Миколу Шанту, Асї Папуґа, можлїве и Ксениї Лїкар (з Миклошевцох), после чого исти дзень будзе перши з вецей планованих литературно-музичних вечарох. На тим першим, 6. новембра, госц будзе и Светислав Басара.
Два програми КМ у Коцуре буду отримани 12. новембра – у ОШ и Читальнї, а 14. новембра у Етно-клубу „Одняте од забуца”, у орґанизациї Месного одбору Рускей матки, дзе плановане и представянє компакт-диску з приповедками Владимира Сабо-Дайка „Ровнї цар”.
Литературно-музични вечар у Дюрдьове тиж будзе 14. новембра, а термин отримованя подобного вечару у Осиєку будзе утвердзени тих дньох.
У Руским Керестуре 7. новембра, попри представяня кнїжкох, будзе представени и нови компакт-диск „Керестурски штири дзвони”, на хторим руски шпиванки шпиваю штирме священїки и єден дзияк, иншак нашо дакедишнї и терашнї познати шпиваче.
Цаловечарши концерт Суботицкого тамбурового оркестру будзе у Велькей сали керестурского Дому култури 13. новембра, а тот вечар будзе попреплєтани з горе спомнутима творами Гавриїла Костельника.
Двацец друга „Костельникова єшень” будзе закончена на соботу, 21. новембра, з традицийним пополадньовим Стретнуцом рецитаторох у Кули и вечаршу главну Мултимедиялну програму младих „Дньовка”, у Керестуре.
Дзень пред тим, у рамикох „Дньовки” будзе отворена вистава фотоґрафийох вибраних з конкурсу „Пакту Рутенорум”, представени нови компакт-диск з композициями Златка Русковския, а планована и промоция младежскей емисиї „Останьце нашмеяни” Радио Нового Саду.