НОВЕ ОРАХОВО – Всоботу и внєдзелю, 27. и 28. авґуста, у Новим Орахове отримана 15. Манифестация „Днї нового хлєба”, по словох нащивительох, найуспишнєйше орґанизована потераз.
Всоботу ше змагали спортски екипи у фодбалу и кошарки, домашнї и екипи з околних местох. После змаганьох найлєпшим екипом додзелєни погари, а потим орґанизовани заєднїцки полудзенок. У пополадньових годзинох були „Бависка без гранїцох”, а вечар диско.
Внєдзелю отримане медзинародне змаганє у вареню котлїка з овчецини, а победзел Имре Чабаї и його екипа. У голу кино-сали отворена вистава роботох хтору пририхтали члени Секциї ручних роботох „Чипки и ружи”. Каждого року на тей вистави и часц народного облєчива, та того року виложени вецей як сто рижни хусточки на главу. Отримана и програма за дзеци „Розбавена улїчка”.
Служба Божа у хторей о. Ґабор Барта пошвецел нови хлєб почала у пополадньових годзинох, а потим нащивителє Манифестациї могли пойсц на промоцию кнїжки Леванте Часара, вожиц ше у каруцох, лєбо покоштовац бухти хтори понукали членїци Активу женох з валалу.
У културно-уметнїцкей програми участвовали дружтва зоз дзешец местох бачкотопольскей општини и Сенти, як и з Републики Мадярскей. Спред КУД „Петро Кузмяк” наступела дзецинска фолклорна ґрупа хтору за наступ пририхтал Владимир Маґоч. На концу наступели шпиваче Жарко Прибичевич з Бачкей Тополї, Атила Кекинь з Мадярскей и тамбурашски состав зоз Трешнєвцу.
Манифестацию „Днї нового хлєба” орґанизує Месна заєднїца Нове Орахово, алє були уключени и други цивилни орґанизациї у валалє, як и числени спонзоре.
