ДЮРДЬОВ – Националне швето Руснацох у Републики Сербиї вчера означене и у Основней школи „Йован Йованович Змай” у Дюрдьове.
З богату и шветочну програму школяре руских и сербских оддзелєньох зоз шпиванками, драмскима сличками и читаньом виривкох з историї Руснацох, намагали ше шицким присутним потолковац хто Руснаци и прецо ше Швето преславює праве 17. януара. По програми у школскей зборнїци бул коктел, на котрим понукнути руски народни єдла – капушнїки, геровци и колачки на грубо котри и того року за тоту нагоду пририхтали валалчанки Йозефина Балїнт и Леона Хромиш.
На програми були присутни велї школяре и їх родичи, як и Борислав Сакач, предсидатель Националного совиту Руснацох и Вукица Петрович, директорка Школи котри привитали присутних. Ту були и Миломир Шайтош, предсидатель УО Заводу за културу войводянских Руснацох, грекокатолїцки священїк о. Михаил Холошняй, Микола Кухар, координатор Подручней канцелариї у Дюрдьове, Мирослав Такач, предсидатель КУД „Тарас Шевченко”, Душанка Джамбас, предсидателька МЗ Дюрдьов, представителє жабельскей ОШ и локалних здруженьох.
