КОЦУР – На Други дзень Крачуна, вчера 8. януара, у коцурским Доме култури отримани традицийни Крачунски концерт, котри того року вєдно орґанизовали КУД „Жатва”, КУД „Завичайне врело”, грекокатолїцка, римокатолїцка и євангелска церква, Основна школа „Братство єдинство” и Дом култури.
На початку концерту шестра Михаїла Воротняк пречитала святочни текст о Исусовим народзеню, а потим ше шоровали шпиванки, рецитациї и танци членох секцийох.
Наступели дзеци зоз коцурских КУД-ох, виронаучних секцийох грекокатолїцкей и римокатолїцкей церкви и школяре коцурскей Школи.
Дзецинску програму збогацели и члени коцурскей євангелскей церкви котри на два заводи шпивали коляди.
На тогорочним концерту танци КУД „Жатва” провадзел и оркестер КПД „Карпати” зоз Вербасу.
Сала коцурского Дома култури була полна, а публика кажду точку наградзела зоз моцним аплаузом.
