ЖАБЕЛЬ – На вчерайшей конститутивней схадзки Скупштини општини (СО) Жабель, дотерашнї предсидатель Општини Чедомир Божич знова вибрани на тоту длужносц, тераз спред Сербскей напредней странки (СНС), понеже лїстина Ґрупи гражданох „Чедомир Божич-Наша општина Жабель”, хтора участвовала на локалних виберанкох, у медзичаше прешла до СНС.
Як пише портал Општини Жабель, на конститутивней схадзки верификовани мандати 31-ому новому одборнїкови, а за предсидателя СО вибрани Радован Чолич зоз СНС.
За заменїка предсидателя СО вибрана Милица Виславски з Партиї зєдинєних пензионерох Сербиї, з Дюрдьова. Кандидати Партиї зєдинєних пензионерох Сербиї (ПЗПС) на локалних виберанкох були на лїстини СНС
За заменїка предсидателя Општини вибрани Стоян Бороя зоз СНС, а на вчерайшей схадзки вибрана и нова Општинска рада.
Виберанкова лїстина „Александар Вучич-Сербия победзує” у СО Жабель ма 22 одборнїкох. Попри ПЗПС, як коалицийни партнере СНС на тей лїстини були и кандидати з Руху социялистох, а познейше ше приключели и 9 одборнїки з горе спомнутей лїстини Чедомира Божича.
У опозициї у СО Жабель Лиґа социялдемократох Войводини (ЛСВ) з трома одборнїцкима мандатами и з по двома освоєнима местами Социялистична партия Сербиї (СПС), Сербска радикална странка (СРС) и Ґрупа гражданох „Гражданска инициятива”.
У новим зволаню локалного парламенту пецеро одборнїки з Дюрдьова – спомнута Виславскова, Радован Чолич, Душанка Джамбас и Сандра Станкович зоз СНС, та Владимир Балоґ з ЛСВ.