РУСКИ КЕРЕСТУР – У дзевятим колє Першенства кадетскей лиґи всоботу, 2. новембра на домашнїм терену, ФК „Русинˮ поражени од ФК „Славияˮ зоз Пиньвиц зоз резултатом 1:3 (0:2).
На перши одпочивок, госцуюца екипа пошла зоз двома ґолами предносци, а потим такой на початку другого полчасу, фодбалере Русину гоч у просеку младши за єден рок од процивнїкох, зоз борбеним и шмелим бависком, зменшали резултат на 2:1.
Преламни момент змаганя зазначени у другим полчаше, кед бавяч процивнїцкей екипи зоз шеснац метерох бавел зоз руку, алє судия Русиновцом нє досудзел пенал.
Пред конєц другого полчасу, у контра нападу Русиновци достали треци ґол и то бул и конєчни резултат того дзевятого кола.
Ґол за Русин дал Лука Иличич, а наступели у составе: Чордаш, Максимович, М. Надь, Бодянец, Няради, Джуджар, Чонка, Н. Ковачевич, Тома, Иличич, Д. Надь, Драґутинович, М. Ковачевич, Бики и Попов.
Шлїдуюце госцованє кадети Русину буду мац у Зомборе на соботу 9. новембра, процив ФК „Жакˮ, а у остатнїм колє єшеньскей часци сезони 2019/2020., млади Русиновци дочекаю ФК „Будучносцˮ з Младенова.
