БЕОҐРАД – Посланїки Скупштини Сербиї вчера за поверенїцу за защиту ровноправносци вибрали Бранкицу Янкович, на предлог скупштинского Одбору за уставни питаня и законодавство.
Янковичова народзена 18. януара 1973, року, закончела Правни факултет у Беоґрадзе, тераз є докторант на Факултету безпечносци у Беоґрадзе, одата є, мац двоїх дзецох.
У своєй кариєри була державни секретар у Министерстве роботи, обезпечованя роботи и социялней политики у мандату предходней влади, седем роки водзела Ґеронтолоґийни центер Беоґрад, була шеф прегваряцкей ґрупи 19 у прегваркох о придружованю ЕУ, ИПА службенїк за шицки ИПА програми помоци у тим министерстве.
Дотерашнєй поверенїци за защиту ровноправносци Невени Петрушич, котра на тоту функцию вибрана на предлог ДС, 5. мая вишол пейцрочни мандат.
Бранкицу Янкович за поверенїка предложели странки владаюцей коалициї у Народней скупштини, а процив єй вибору були посланїки опозициї и вецей нєвладово орґанизациї.