Буджет инвестицийни, обезпечени и пенєж за добудов Дому здравя

автор зам  фото ипц
803 Опатрене

КУЛА – З прилапеним ребалансом буджету за тот рок, плановани приходи Општини Кула тераз виноша 2 милиярди 129 милиони динари, дзе приходи до буджету 2 милиярди 56 милиони, а дополнююци приходи буджетних хасновательох  (директно на їх рахунки) 72 милиони 400 000 динари. За инвестицийни укладаня, односно капитални проєкти плановани милиярда 271 милион динари, цо коло 59 одсто буджету – гварене на вчерайшей схадзки Скупштини општини (СО) Кула при прилапйованю ребалансу буджету.

Предсидатель Општини Кула Перица Видеканїч визначел же вчера у буджету Општини було 168 милиони динари, а як гварел – ребаланс пошлїдок обезпечованя средствох з висших жридлох, дзе и 74 милиони динари за софинансованє вибудови нового кридла Дому здравя у Кули. Ґу тому, у буджету и 103 милиони динари за инвестициї хтори буду пренєшени до идуцого року.

– Буджет инвестицийни и шицко цо обецане будзе и поробене, аж и вецей як плановане, понеже после нєдавней нащиви предсидателя Покраїнскей влади Иґора Мировича, кулска општина од Покраїни достанє прейґ 200 милиони динари – гварел Видеканїч на схадзки СО.

На вчерайшей длугей схадзки СО Кула, понеже на дньовим шоре були аж 20 точки, прилапени и Закончуюци рахунок буджету Општини за 2015. рок, звит о витворйованю буджету за прешли и за перши тогорочни шейсц мешаци, як и Рочна програма защити, ушореня и хаснованя польопривредней жеми за тот рок. Согласносц на Програму дало и ресорне министерство и пошвидко почнє лицитованє державней жеми за бранє под аренду.

Медзи иншим, пре ускладзованє з новима законскима преписанями, одборнїки дали согласносци на вименки и дополнєня сновательних актох явних комуналних подприємствох (ЯКП) и на програми їх дїлованя. Тиж прилапени и звити о дїлованю у прешлим року, медзи нїма и за рускокерестурске ЯКП „Руском”, як и согласносци о розподзельованю добитку з 2015. року у дзепоєдних ЯКП.

Прилапени и звити о дїлованю установох у култури за 2015. рок, медзи нїма и Дому култури Руски Керестур, а вязано за Дом култури, СО Кула вчера место покойного Юлияна Рамача Чаму, до Управного одбору тей установи спред занятих меновала Мирона Хрина, место котрого до Надпатраюцого одбору Дому култури спред занятих меновани Владимир Малацко.

5-SO-02

ПОВЯЗАНИ ТЕКСТИ