КУЛА – Буджет Општини Кула за 2016. рок „реални, амбициозни и инвестицийни”, гварел на вчерайшей схадзки Скупштини општини (СО) Кула заменїк предсидателя Општини Велибор Милоїчич, визначуюци же то „коруна роботи терашнєй коалициї на власци, на чолє зоз Сербску напредну странку”, понеже ше, як гварел, шицко о чим бешедоване и обецоване остатнї три роки – з тим буджетом почнє витворйовац.
Толкуюци буджет Милоїчич наглашел же за шицко предвидзене средства и обезпечни – з власних приходох, з висших уровньох власци и кредитох, та плановане и витворлїве, а цалосни прилїв до општинскей каси у 2016. року проєктовани на 2 милиярди 114 милиони 373 000 динари.
Наглашел же у каждим населєним месце у општини уж, лєбо буду порушани инвестицийни роботи, а капитални проєкт будзе вибудов канализацийох у Кули и Червинки и поцискуюцого воду по главни пречисцовач Кула-Вербас и вредносц тих роботох 600 милиони динари.
– У буджету за 2016. рок за тоту намену обезпечени 408 милиони, а 192 милиони буду у буджету за 2017. рок. З висших уровньом власци плануєме достац 60 милиони, но обчекуєме же буду и векши. Уж розписани явни набавки за вибудов канализацийней мрежи у штирох улїцох у Кули, а за други би мали буц розписани до конца януара. Ведносц цалого проєкту коло 5 милиони еври, з чим конєчно будзе ришена заґадзеносц Велького Бачкого беґелю – гварел Милоїчич на СО Кула. У вибудови канализацийней мрежи участвую и самодоприноси у двох месних заєднїцох у Кули.
Векши инвестициї плановани и у обласци польопривреди, за цо наменєни 192 милиони динари з даваня жеми под аренду и месних самодоприносох; за директних и индиректних буджетских хасновательох опредзелєни коло милиярду динари, дзе за социялни даваня коло 90 милиони, а за укладаня и набавку новей опреми у школох 75 милиони динари.
Єдна з векших инвестицийох будзе и початок вибудови нового Дому здравя у Кули, чия инвестицийна вредносц коло 162 милиони динари. У општинским буджету обезпечени инициялни 22 милиони, же би ше потребни средства глєдало од Канцелариї за явни укладаня.
У идуцим року плановане почац и вибудов спортско-рекреативного центру у Кули (на Вашариску, за бензинску пумпу спрам Вербасу), за цо з кулского самодоприносу опредзелєни 28 милиони, а вєдно 45 милиони динари, док акцент будзе дати и на вибудов отворених спортских теренох у местох кулскей општини.
За шицки инвестицийни укладаня у кулскей општини – з власних средствох, самодоприносох, з других жридлох, а хтори буду витворйовани и прейґ „ЯП „Завод за вибудов” Кула, у идуцим року вєдно плановани милиярду 316 милиони 386 000 динари.
