НОВИ САД – Шицки котри сцу участвовац у проєкту безплатних учебнїкох за школярох основних школох у Сербиї, можу ше приявиц на одвитуюци конкурс по штредок марца, виявела помоцнїца министра просвити, науки и технолоґийного розвою Зорана Лужанин, а пренєсол Танюґ.
До конца мешаца будзе направена лїстина тих котри достали гоч яку файту тей помоци, а потим родичи, лєбо старателє приявених школярох буду поволани же би вєдно з учителями и оддзелєнскима старшинами пополнєли прияви о тим же хтори учебнїки сцу же би им Министерство купело.
Лужанинова наглашела же того року, як и прешлого, за набавку безплатних учебнїкох у буджету видвоєни вецей як 600 милиони динари, цо нєдосц за комплет учебнїкох за каждого основца, алє будзе за штварцину тей школярскей популациї.
Од того року школяре учебнїки доставаю тирвацо, а главни критериюм за їх доставанє будзе социялни, односно материялни статус фамелиї школяра.
Родичи и старателє ше можу приявиц на конкурс так же пополня одвитуюци формулар и придаю на увид фотокопию даєдного особного документу.