СЕРБИЯ – Социялно-материялни статус фамелиї будзе єден з найважнєйших критериюмох же би дзецко достало безплатни учебнїки, цо значи же приоритет за доставанє учебнїкох буду мац дзеци з худобнєйших фамелийох. По нових законских ришеньох, безплатни учебнїки годни достац и школяре висших класох основних школох, а нє лєм од першей по штварту класу, яка пракса була дотераз – предкладаю з Министерства просвити.
У тим сеґменту ище вше нє ришени велї питаня, а єдно з найзначнєйших то же чи би найхудобнєйши требали доставац цали школярски комплет, а дзепоєдни же би доставали часц. Окрем того, треба одредзиц и способ вибераня учебнїкох, односно цо шицко ма буц у школярским комплету, понеже нє шицки школи и оддзелєня хасную исти учебнїки.
– Министерство уж прави реґистри учебнїкох хтори ше хаснує того року за кажду школу и за кажде оддзелєнє, та будзе ясне цо ма буц у комплету – гварела за Танюґ помоцнїца министра просвити Зорана Лужанин и наявела же шицки деталї и критериюми буду дефиновани по марец.
Министерство просвити до проєкту уключело и Министерство за роботу, обезпечованє роботи и УНИЦЕФ, а за його реализацию опредзелєни 680 милиони динари, гварела Лужанинова.