РУСКИ КЕРЕСТУР – На вчерайшей Скупштини акционерох керестурского Привредного дружтва (Дружтво) ”АБЦ ФУД” зменєни дотерашнї директор Зоран Булатович, котри на тоту длужносц бул меновани у Планє реорґанизациї, а за вивершного директора вибрани дипл. аґро-економиста Александар Арбутина з Нового Саду.
За єдну спомедзи трох ткв. ”дополююцих заступнїкох Дружтва” менована и векшинска власнїца фабрики Виолета Шулеич, як и двоме заступнїки з Греческей.
За нєвивершних директорох на Скупштини вибрани Милян Ристанович з Нового Саду и Желько Плавша з Беоґраду, и вєдно з Арбутином творя Одбор директорох хладзальнї. Вивершни директор будзе мац огранїченя у заступаню, понеже Дружтво годзен заступац зоз соподписом Виолети Шулеич и соподписом було котрого з других двох дополнююцих заступнїкох. Тиж и Шулеичова у заступаню муши мац соподпис лєбо вивершного директора, лєбо єдного зоз заступнїкох.
Понеже Скупштина отримана 9. октобра понїщена прето же на нєй нє присуствовал новтаруш, вчерайша позарядова Скупштина акционерох ”АБЦ ФУД”, хтору зволал Привредни суд у Зомборе, пре його присуство отримана у канцелариї новтаруша Ненада Букарици у Оджаку. По нових законских предписаньох, на схадзкох скупштинох привредних дружтвох хтори маю вецей як 100 акционерох муши присуствовац и новтаруш, котри водзи записнїк.
Скупштина одлучовала полноважно, понеже на схадзки присуствовали представителє власнїкох 82,42 одсто акцийох, лєбо 54 807 гласох, у чим учасц у гласаню представительох меншинских акционерох з Керестура котри вчера присуствовали на схадзки виношела 0,47 одсто акцийох.
На схадзки поприношени шицки одлуки як и на понїщеней Скупштини 9. октобра, а представителє меншинских акционерох пригварели же о змени вивершного директора нє консултовани Одбор поверительох, спрам у Планє реорґанизациї, на цо представитель векшинского власнїка одвитовал же План реорґанизациї одредзує же Скупштина акционерох на першей схадзки после його приношеня вибера директорох.
Нє прилапена анї знова дата пригварка меншинских акционерох же би ше до Статуту и Сновательного акту уписало реалну дїялносц дружтва – преробок желєняви, а нє як стої же то ”хованє жита (крем ризкаши), леґуминозох и олєяркох”. Гласаюци процив принєшених одлукох, меншински акционере виражели и обавянє до порихтаносци нового руководства за витворйованє Плану реорґанизациї „АБЦ ФУД”.
Пре одсутносц зоз Сербиї, директора Зорана Булатовича на Скупштини заступал його сотруднїк Ґоран Ковачевич и, як нєурядово гварел, на одлуки принєшени на тей Скупштини вироятно поднєшу жалби.
Як поведзене на схадзки, вчера принєшени одлуки важаци з дньом приношеня.