На коло 20 штандох на хторих були порихтани стародавни єдла и ручни роботи, а нащивителє мали и цо видзиц и цо коштовац. Шицки ше намагали охабиц цо лєпши упечаток, направиц цо красши штанд и понукац цо смачнєйши єдла.
Руску традицию представели жени зоз КПД „Дюра Киш” и Здруженє женох „Бикичанки” з Бикичу. Жени зоз Здруженя женох „Жридло” зоз Беркасова указали як ше у прешлосци, кед нє було райбачки и детердженти, шмати райбалo у древеним кориту, цо прицагло вельку увагу нащивительох.
Состойна часц манифестациї бул и концерт на хторим тиж були злучени шпиванки, музика, танєц и обичаї. Зоз венчиком руских шпиванкох представели ше Старша мишана шпивацка, як и Младша мишана шпивацка ґрупа КПД „Дюра Киш”. Наступели и Мишана шпивацка, як и хлопска ґрупа КПД „Иван Котляревски” зоз Бикичу. Удатни наступ мала и танєчна пара „Дюри Кишу” Милица Миклош и Александар Радин, хтори одтанцовали „Буковински танєц”.
На концерту наступели и СКУД „Єднота” зоз Шиду и Горватске КУД „Шид”, потим шпиваче (хор и вокални солисти) КУД „Єшень живота”, а першираз наступело и Здруженє Ромох „Романи рота”.