КОЦУР – Вчера, 13. априла, у Церковней сали у Коцуре отримани цалодньови Вельконоцни вашар котри орґанизовал парохийни Каритас.
Нащивителє могли купиц рижни вельконоцни прикраски, паски, писанки, мед, домашнї маджуни, рижни продукти зоз цеста и ручни роботи на тему Велькей ноци.
Предавачох и викладачох було вкупно дванацецеро, а окрем домашнїх Коцурцох, було викладачох котри пришли зоз Пиньвиц и Руского Керестура.
Цени були символични, нащивителє приходзели цали дзень опатрац и куповац, а окрем того, могли достац совити и идеї же як на интересантни способи прикрашиц тогорочни писанки, а Вельконоцни вашар нащивел и владика кир Георгий Джуджар.
На Вельконоцним вашаре ше зберало и добродзечни прилог за роботу КУД „Жатва”, та з тей нагоди назберане 5 888 динари котри буду вихасновани за потреби културного дружтва.
