БЕОҐРАД – З обявйованьом у „Службеним глашнїку”, вчера почала важиц Одлука о максималним чишлє занятих у явним секторе, а установи муша реґуловац число занятих по фебруар 2016. року.
Министерство просвити и шицки установи под його инґеренцию, од основного по високошколске образованє, будзе мац найвецей стаємно занятих – 136 837. На факултетох годни буц заняти 23 427 особи, у штреднїх школох 33 079, а у основних 71 379 роботнїки.
Установи за хтори задлужене Министерство здравя буду мац найвецей 114 056 стаємно занятих.
У Министерстве правди и шицких його часцох годни буц заняти 15 258 особи, Министерстве финансийох 10 324, а у шицких часцох Министерства привреди 1 250 особи.
У явних установох за хтори задлужене Министерство роботи, обезпечованя роботи, социялних и борецких питаньох буду заняти вєдно 14 487 роботнїки, а найвекши процент у установох социялней защити.