Вельки процент младих жиє з родичами

автор ртв/сен
988 Опатрене

БЕОҐРАД – У Сербиї вецей як половка младих од 18 до 30 роки жиє з родичами, а подобна ситуация у цалим швеце. Найзначнєйша и найчастейша причина то нєдостаток пенєжу, алє и психолоґийни и социолоґийни причини.

– Находзенє власного дому, односно висельованє з родительскей хижи значи и виход на три розлични тарґовища: на тарґовище роботи, тарґовище нєрухомосцох и финансийне тарґовище, цо углавним значи и кредит за купованє першого квартелю, а кажде з тих тарґовищох ма окремни ризики и нєсиґурносци – гварел за РТВ Александар Томашевич з Одсеку за социолоґию на Филозофским факултету у Новим Садзе.

Млади гваря же главни причини за оставанє з родичами то почежкосци у доходзеню до роботи и мали приходи, медзитим фаховци думаю же младим хиби и иновативносц и акция.

Способ воспитованя дзецох главна причина же маме вше вецей „вичних адолесцентох“. Психолоґи думаю же кед дзеци оставаю при родичох длужей як 19 роки, вони поступнє буду мац вше нїзше самопочитованє, буду нєзадовольни и нєцерпезлїви.

Проблем би могло ришиц з реформами системи школованя, хтора оможлїви законченє студийох по 20. рок, та би млади у найпродуктивнєйших рокох – од 20. по 30. рок могли основац фамелию и розвивац кариєру.

ПОВЯЗАНИ ТЕКСТИ