ВЕРБАС – У Вербаше 30. децембра прешлого року Скупштина општини (СО) Вербас прилапела буджет за 2016. рок, по хторим плановани приходи 1,195 милиярди динари, розходи 1,233 милиярди, а буджетски дефицит 38,4 милиони динари.
Як визначел заменїк предсидателя Општини Милан Ґлушац, буджет нє будзе анї розвойни, анї социялни, алє рестриктивни, насампредз пре нєзавидну финансийну ситуацию у хторей Општина уж длугши час.
На остатнєй прешлорочней схадзки СО прилапени и ребаланс буджету за 2015. рок и порушани поступок ликвидациї ЯП „Дирекция за вибудов”.
Одборнїки на тей схадзки одлучовали о прейґ 40 точкох дньового шору, та прилапена Одлука о Програми ушорйованя городскей будовательней жеми за город Вербас и населєни места општини за 2016. рок и Стратеґия отримуюцого розвою општини Вербас за период 2014-2020. рок.
На схадзки прилапени и програми дїлованя ЯП „Вербас-ґаз”, ЯКП „Комуналац”, ЯКП „Стандард”, ЯП за транспорт путнїкох „Вербас”, програми роботи Културного центру Вербас и Народней библиотеки „Данило Киш”, Центру за физичну културу „Драґо Йовович”, Дому здравя „Велько Влахович”, Апатики „Вербас” и других установох хторим Општина снователь.