БЕОҐРАД – Министер просвити Срдян Вербич оценєл же треба отримац обсяжну явну розправу о цильох и форматох гражданского воспитаня и виронауки, хтори обовязни виборни предмети у наших школох.
Здруженє гражданох „Граждански инициятиви” у отвореним писму министрови предложело же би ше порушало явну розправу о цилю и формату настави гражданского воспитаня, цо Вербич прилапел, алє оценєл же вец явну розправу треба отвориц и о другим обовязним виборним предмету – виронауки. Министер гварел же нє спорни теми хтори маю буц обрабяни на годзинох гражданского, алє способ їх реализациї.
– Кед потребне же би гражданє, а окреме фахова явносц, виражели свойо думанє о наставним планє и програми, то треба зробиц праве у случаю предметох хтори роздвоюю и етикетирую школярох ище пред тим як науча писац назви тих предметох – одвитовал Вербич на отворене писмо.