Вецей медиї пред гашеньом як цо су успишно предати

автор саб
1.1k Опатрене

НОВИ САД – Конференция з тему „Приватизация медийох – нагода, чи нєставанє?” отримана вчера у Скупштини АП Войводини з намиру понукнуц одвит на питанє чи процес виходу держави з власнїцтва у локалних медийох представя гашенє информованя на локалним уровню, чи шансу за обновйованє интеґритету новинарскей професиї.

На конференциї повторени од скорей познати и у явносци од початку процесу приватизациї присутни становиска компетентних актерох на медийней сцени: фахово новинарски здруженя и приватни медиї потримую виход держави з власнїцкей структури, як способ же би медиї були нєзависни од уплїву политики и ровноправни на тарґовищу, а представителє покраїнскей власци и националних совитох меншинских заєднїцох ґу ньому критични, пре обаванє же локални и меншински медиї, як нєкомерциялни, нє можу обстац без державней помоци. То, як визначую, може загрожиц здобуте право на информованє на мацеринским язику.

По оцени нєзависних виглєдовачох, биланс приватизациї законченей 31. октобра же єст вецей медиї хтори пред гашеньом як тих цо су успишно предати. Анализи указую же нови власнїки углавним нє з медийней сфери, та пред конєчну оцену охабени период же би ше указали у новей улоги. Проблематичне же найменєй медиї приватизовали у нїх заняти.

Окремни квалитет вчера отримане конференциї, гоч су можебуц позно представени нашей фаховей явносци, були искуства горватских и словенских новинарох, чийо медиї през приватизацию прешли пред 10, односно 20 роками.

Конференция „Приватизация медийох – нагода, чи нєставанє?” орґанизована у рамикох медзинародного проєкту „Медийна обсерватория Юговосточней Европи”, у хторим домашнї партнер Новосадска новинарска школа.

ПОВЯЗАНИ ТЕКСТИ