ШИД – З потвердзованьом мандатох одборнїком, вчера, 16. мая, конституована Скупшптина општини (СО) Шид у новим зволаню, а одборнїки потим вибрали и найвисших руководительох локалней власци.
За предсидателя СО вибрани Велимир Ранисавлєвич, 53-рочни транспортни технїчар з Илинцох з лїстини Сербскей напредней странки „Александар Вучич-Сербия победзує”, хтора на општинских виберанкох освоєла 23 зоз 39 мандатох у локалним парламенту. За заменїка предсидателя СО вибрани Никола Видич, новинар з Бачинцох, тиж з лїстини „Александар Вучич-Сербия победзує”.
За предсидателя Општини Шид вибрани Предраґ Вукович, дипл.економиста, котри бул перши на спомнутей лїстини, а за його заменїка вибрани Зоран Семенович, дипл. инженєр аґроекономиї. По функциї, вони двоме и предсидатель и заменїк предсидателя Општинскей ради, до хторей вибрани ище дзевецеро члени, з котрих тройо буду на стаємней роботи.
За секретара СО одборнїки вибрали Милану Момчилович Свилокос, дипл. правнїцу, а меновани и Одбор за административни и мандатно-имунитетни питаня и формована Комисия за примопридаванє длужносци.
После потвердзованя мандатох, одборнїки з опозицийних странкох у СО Шид – з ДС, ЛСВ, СДС и ЛДП, як и зоз СРС и СПС напущели скупштинску салу, у хторей спред социялистох остал др Бранислав Маукович, а спред Желєней еколоґийней партиї-Желєни Деян Булатович, котри гласали за вибор општинскей власци.
