РУСКИ КЕРЕСТУР – На схадзки УО Рускей матки хтора вчера вечар отримана у Руским Керестуре и на хторей предшедовал єй предсидатель Дюра Папуґа, вибрани 10 делеґати тей орґанизациї за XIII Шветови конґрес Руснацох/Русинох/Лемкох (ШК РРЛ), хтори будзе у юнию у Румуниї. Вибрани и 5 делеґати за VII Шветови форум русинскей младежи, хтори будзе источашнє отримани.
На ШК зоз Сербиї пойду делеґати Дюра Папуґа, Сенка Мученски, Миломир Шайтош, Юлиян Лазор, Владимир Бучко, Михайло Фейса, Наташа Макаї Мудрох, Моника Гарди, Мария Дорошки и Владо Джуня. Медзи делеґатами и члени шейсц конґресних Комисийох, хтори УО вибрал ище у марцу.
Як делеґати за VII Шветови форум русинскей младежи зоз Сербиї вибрани Борис Фейди, Ирена Скубан, Себастиян Няради, Татяна Шайтош и Стеван Самочета.
Як поведзене на вчерайшей схадзки УО, пре огранїчени финансийни средства домашнього Конґресу, нє буду участвовац госци з членских орґанизацийох ШК РРЛ, алє лєм госци предсидателя ШК Дюру Папуґу.
Медзи дзешец його госцами зоз Сербиї предложени народна посланїца Олена Папуґа, предсидатель Асоцияциї русинских подобових творительох Владо Няради и подпредсидателька Реґионалного одбору Рускей матки за Срим у Шидзе Саня Тиркайло.