Виведзени дванац танци, медзи нїма першираз и заєднїцки

автор тах
914 Опатрене

КОЦУР – На закончуюцей програми Фестивалу фолклору Руснацох и других националних заєднїцох „Коцурска жатва 2015”, хтора всоботу, 11. юлия отримана у Велькей сали Дому култури у Коцуре, участвовали танєчни ансамбли з дзевец дружтвох, хтори виведли дванац танєчни точки. Попри у сали, публика тоту часц Фестивалу провадзела и вонка, опрез Дому култури, дзе бул поставени вельки видео-бим.

1-Tanci-02

З танцами ше представели домашнє КУД „Жатва”, КПД „Карпати” з Вербасу, Дом култури з Руского Керестура, КУД „Тарас Шевченко” з Дюрдьова, КУД „Петро Кузмяк” з Нового Орахова, КПД „Дюра Киш” зоз Шиду и КУД „Яким Ґовля” з Миклошевцох, з Горватскей.

Госц коцурского КУД „Завичайне врело” бул танєчни ансамбл КУД „др Младен Стоянович” з Младенова, а представителє мадярскей националней заєднїци у Коцуре на „Коцурску жатву” поволали КУД „Кароль Сирмаи” з Вербасу, хторе ше представело з двома шпиванками.

Интересантне дожице було видзиц и ткв. „семинарски танєц”, як єден з конкретних резултатох прешлого мешаца отриманого семинару за танєчнїкох з наших местох у Руским Керестуре, у орґанизациї Заводу за културу Войводянских Руснацох. Заєднїцки витворени танєц „Тропотянка” першираз представени праве на „Коцурскей жатви”, у виводзеню танєчних парох з вецей наших местох, у хореоґрафиї Миколи Мовнара з Ужгороду, з України, котри бул преподаватель на спомнутим семинаре.

Конферансу написал Микола Шанта, а водзели ю Емилия Чизмар и Стеван Самочета.

ПОВЯЗАНИ ТЕКСТИ