ВОЙВОДИНА – Польопривредни фахово служби совитую польопривреднїкох же би роботи на полю почали аж од идуцого тижня, прето же тераз дує моцни витор и нїзки температури. Републични Гидрометеоролоґийни завод Сербиї (РГЗС) од ютра наявює висши температури, цо будзе вигодне за початок шаца.
Фаховци гваря же кед би ше тераз пошало, нашенє би лєм стало у жеми, а кед придзе до паданьох, воно будзе под дїйством патоґених бактерийох, хтори очкодую будуцу рошлїну. Препоручене же би ше зоз шацом почало после вельконоцних шветох, алє и апеловане же би ше пред тим окончело защиту жита
З Проґнозно-звитодавней служби Автономней покраїни Войводини гваря же пре моцни витор нє мож пирскац овоци, цо неґативно дїйствує на їх защиту. Гоч терашня хвиля нє вигодна за рошлїни, на другим боку є добра бо ше у наиходзацим периодзе нє буду розвивац хороти.