БЕОҐРАД – Єдини учебнїк хтори хибел у настави на руским язику за основну школу, а хтори бул у процесу видаваня (учебнїк за седму класу зоз музичней култури) видруковани, и школяре го годни хасновац уж у тим школским року.
– У настави на руским язику хибя ище даскельо ориґинални руски учебнїки хтори, накадзи буду пририхтани, войду до процедури друкованя. По початок школского 2017/2018. року требали би буц и пред школярами – гварела Гелена Папуґа зоз Заводу за учебнїки.
Пред пейцома мешацами Министерство просвити, представнїки осем националних совитох и Завод за учебнїки подписали Спорозуменє о обезпечованю учебнїкох хтори хибя у настави на язикох словацкей, румунскей, бошняцкей, мадярскей, горватскей, болгарскей, рускей и албанскей националней меншини. Прето видвоєни 134 милиони динари же би ше видруковало коло 100 учебнїки.
Зоз Заводу за учебнїки и Министерства просвити, науки и технолоґийного розвою поручене же шицки кнїжки котри хибели за основношколску наставу националних меншинох тераз у процедури виробку. Єдна часц учебнїкох будзе у школских лавкох од 1. септембра, другу часц ше пририхтує, а треца чека допущенє за друкованє.
– Державни видаватель шицким школяром у Сербиї обезпечел учебнїки, та з тим сполнєл обовязку з Акцийного плану хтора ше одноши на национални меншини у рамикох Поглавя 23 – потолковала Єлена Йованович зоз Заводу за учебнїки.
Прешлого школского року 35 000 дзеци ходзели до основней школи на язикох осем националних меншинох. Кельо их будзе школского 2016/2017. року будзе ше знац у октобру.