Викенд з русинско-словацким народним будительом Адолфом Добрянским

автор русин.ск/зам/дюл
1.2k Опатрене

ЗЕМПЛИН (СЛОВАЦКА) – У вецей местох у Земплину, у Словацкей, у дньох викенду за нами отримани науково, духовни и културно-уметнїцки програми пошвецени велькому русинскому, алє и словацкому и славянскому будительови зоз Словацкей – Адолфови Ивановичови Добрянскийови, як проєкт о актуализованю порученя Добрянского ґу сучасней русинскей, словацкей, славянскей и европскей реалносци.

Земплинчан А. И. Добрянски була єдна з найвизначнєйших особох русинского и словацкого живота (1817-1901). По походзеню бул дворян, по фаху рударски инженєр, учашнїк и ношитель народно-препородного русинского и словацкого руху, посланїк у Угорским парламенту, приятель Людовита Штура, сотруднїк словацких, русинских, ческих, сербских и горватских народних будительох, соснователь русинских и словацких народних дружтвох, медзи нїма и Матки словацкей (мал членску карту з числом 4), бул примани у царскей австрийскей палати у Бечу, алє и на царским дворе у Русиї.

Програма на чесц Добрянского почала пияток, 16. септембра, з мемориялну шветочносцу при памятней плочи на його родним доме у Рудлове, дзе отримана и шветочна академия. Всоботу у Михаловцох, у Катедралней церкви св. Кирила и Методия перше отримана мемориялна литурґия, а потим и шветочносц при памятнїку Добрянского.

Главне збуванє була Медзинародна наукова конференция з назву „Порученє Адолфа Ивановича Добрянского за сучасносц”, хтора отримана всоботу, 17. септембра у скупштинскей сали Месного уряду у Гуменим, а под покровительством предсидателя Словацкей Андрея Данка. На Конференциї бешедовали визначни науковци з вецей обласцох, а у рамикох Конференциї у Чертижним, дзе Добрянски поховани, отримана панахида и шветочни концерт.

„Викенд з А. И. Добрянским” закончени вчера, внєдзелю, з провадзацима програмами – шпивачох, шпивацких ґрупох и фолклорних ансамблох з горньоземплинского реґиону у сканзену Вигорлатского музею у Гуменим, реґионалним змаганьом „Фолклорне пополаднє”, як и програму „Порученє предкох” и презентацию ношачу звука русинских шпиванкох за дзеци „Рутеника 2”.

Програми орґанизовали Вигорлатски музей у Гуменим у сотруднїцтве з Русинским интересним здруженьом, Матка Словацка, городи Гумене и Михаловци, општини Рудлов и Чертижне и Месни одбори Русинскей оброди Словацкей у Гуменим, Вранове над Тополю, Медзилаборцох и Габури, з финансийну потримовку Уряду Влади Словацкей и Городу Гумене.

 

ПОВЯЗАНИ ТЕКСТИ