ПОЛЬСКА – Як пише лем.фм, „википедисти”, етноґрафи, музейни роботнїки, виглєдоваче и волонтере премерюю Карпати же би задокументовали фолклор горох. Правя стотки знїмки, знїмаю дзешатки филми и збераю материяли о реґионє пре збогаценє и преширенє змистох статьох на „Википедиї”. Етноґрафия Карпатох проєкт Державного Етноґрафского музею у Варшави, з потримовку „Википедиї Польскей” и Фондациї „Википедия”, а з цильом очуваня карпатскей култури и прейґ „Википедиї”.
Карпати, после Алпох, дуге по велькосци горске пасмо у Европи. Пресцера ше у цалей юговосточней Польскей, у югозаходней України, Словацкей, Ческей, Румуниї и у Сербиї. Народна култура у карпатским ареалу барз рижнородна, алє проєкт ма за циль виглєдац и того цо ю злучує – заєднїцку историю и културни коренї. Як потвердзую члени експедицийних ґрупох – фолклор Русинох тиж тема хтору буду виглєдовац.
Перша етапа проєкту то зберанє библиоґрафиї, жридлох, знїмкох, авдиовизуалних материялох о автентичним фолклору Карпатох, же би потим шицко було доступне на „Википеди Комонс”. Наступна етапа будзе вихасновйованє позбераного материялу за преширенє, або творенє нових, тематских статьох на „Википедиї” (на анґлийским и одвитуюцих локалних язикох). Главна увага пошвецена реґионалному облєчиву, народней уметносци и ремеслу.
Заплановани пейц вики-експедициї. Под час каждей виглєдоваче буду знїмац и записовац традицийни звичаї, обряди, фотоґрафовац народне облєчиво и приклади народней уметносци и ремесла характеристични за дати реґион. Нащивя месни етноґрафски музеї и мали реґионални културни центри. Перша з експедицийох була у другей половки авґуста у Польскей, а того мешаца су у Румуниї, у мараморошским краю. Идуцого року заплановани виглєдованя у Ческей, Словацкей и України.