РУСКИ КЕРЕСТУР – Понеже нє достала векшину од шицких членох Совиту, як то потребне за пременку Статута, Совит Месней заєднїци (МЗ) на вчерайшей схадзки нє прилапел вименку Статута хтора одредзує же у конкурсу за секретара Месней заєднїци єдно з условийох ма буц лєм „познаванє руского язика”, як то предложене з Општини Кула. З тим за тераз остала одреднїца же би єдно з условийох за тото место було „активне знанє руского язика”, як то стої у предлогу вименкох хтори дала Комисия за вименки Статута МЗ, а прилапени су и на предостатнєй схадзки Совиту, 26. фебруара.
На вчерайшей схадзки присуствовали 13 з 15 членог Совиту, а „за” вименку Статута МЗ з одреднїцу „познаванє руского язика” гласали 7 члени, процив були 5, а єден член бул стримани, так же нє було потребни найменєй 8 гласи за вименку Статута.
На другим боку, одреднїца о активним знаню руского язика нє прилапена за систематизацию роботних местох, алє одреднїца „познаванє руского язика”, понеже за вименку систематизациї потребна векшина присутних членох на єдней схадзки, а нє шицких членох Совиту. „За” таку вименку систематизациї гласали 7, процив були 4, а стримани 2 члени Совиту, так же будзе унєшена до Правилнїку о систематизациї роботних местох у МЗ.
На вчерайшей схадзки члени Совиту котри углавним гласали „за” вименки Статута и систематизациї наглашовали же уж треба закончиц тоти формалносци о актох МЗ и почац конкретно робиц, док члени Совиту котри були процив предложених вименкох визначели же за предкладанє з Општини нє досц лєм усмени толкованя, алє вимагали же би дала писмени арґументи на основи хторих документох при виборе секретара МЗ нє може стац одреднїца о активним знаню руского язика. Тиж предкладали же би ше о тим питаню вияшнєл и Совит за медзинационални одношеня Општини Кула.