НОВИ САД – Попри на шалтеру филияли Републичного фонду за здравствене осиґуранє, у Новим Садзе на ище 17 локацийох пензионере и старши гражданє котри нє хасную компютер можу придац вимоги до Е-управи за правенє новей здравственей карточки – у 15 месних заєднїцох, та у Здруженю пензионерох Нови Сад и Ґеронтолоґийним центре.
Як пише портал Городу Нови Сад, тота помоц оможлївена дзекуюци догварки городоначалнїка Нового Саду Милоша Вучевича и министерки державней управи и локалней самоуправи Ани Брнабич и после Беоґраду, Нови Сад друга локална самоуправа хтора у тим орґанизовано помага старшим согражданом.
По 31. децембер, кажди роботни дзень од 8 до 12 годзин, вимоги за доставанє нових здравствених карточкох мож придац у Здруженю пензионерох (Поштанска 3), Клубу за старши и одроснути особи Ґеронотолоґийного центру (Бул. Слободана Йовановича 29), та у месних заєднїцох „Иво Андрич” (Бановиґ Страхинї 20), Клиса (Савска 27), Буковац, Сримска Каменїца, Стари Лединци, Кать, Будисава, Ковиль, Руменка, Кисач, Степановичево, Ветерник, Футоґ, Беґеч и Ченей.
Зоз собу треба принєсц стару здравствену кнїжочку, а на месце подношеня вимоги ше достанє инструкциї за уплацованє трошкох за видаванє здравственей карточки (400 дин., односно вецей кед ше ю сце достац по пошти).