НОВИ САД – Винчованки з нагоди Велькей ноци по юлиянским календаре вирним и священству вчера упутели предсидатель Покраїнскей влади Боян Пайтич и городоначалнїк Нового Саду Милош Вучевич.
– Вельконоцни швета час хтори найкрасше препровадзиц з любенима и блїзкима. Вирним, священству церквох и вирских заєднїцох котри тото швето преславюю по юлиянским календаре, од шерца жадам же би го дочекали и преславели радосно, у мире, як и же би нам ше шицким витворело тото цо Велька ноц символизує – оживйованє надїї и вири до лєпшого швета и племенїтшого людского дружтва – гвари у винчованки Боян Пайтич.
Городоначалнїк Нового Саду Милош Вучевич виражел найсердечнєйши винчованки за Вельку ноц, з жаданьом же би го шицки препровадзели подзековни, задовольни и з виру до доброго у каждим з нас.
– Най нас тото вельке швето Христового воскреснуца здогаднє же єдине праве богатство то духовне богатство. Же воно нєпреходне и нєзнїщуюце. Най нам шветочни днї виполнї чувство красоти даваня и дзелєня и же бизме их препровадзели окружени з наймилшима, у злоги и любови – визначел Вучевич у Вельконоцней винчованки.